नुवाकोट पञ्चकन्यामा भोलिदेखि हुने ‘तेस्रो चेयरमेन कप भलिबल प्रतियोगिता’ तयारी पूरा
नुवाकोट,मंसिर २८। जिल्लास्थित पञ्चकन्या गाउँपालिकाको आयोजनामा भोलिदेखि पुस ३ गतेसम्म हुने अन्तरपालिकास्तरीय ‘तेस्रो चेयरमेन कप भलिबल प्रतियोगिताको तयारी पूरा भएको छ ।
‘खेल र खेलाडीबाट सिकौं अनुशासन र स्वाभिमान, समृद्ध पञ्चकन्या निर्माण हाम्रो अभियान’ भन्ने नारासहित भलिबल प्रतियोगिता हुन लागेको पञ्चकन्या गाउँपालिकाले जनाएको छ । पञ्चकन्या गाउँपालिकाका अध्यक्ष तेजबहादुर तामाङका अनुसार प्रतियोगिताको तयारी पुरा भएको र आगन्तुक अतिथिको स्वागतका लागि ठाउँ ठाँउमा तुल तथा ब्यानर, स्वागतद्वार ब्यवस्थापन गरिएको छ।
गाउँपालिकाको वडा २ मा रहेको कालिका माध्यमिक विद्यालयको प्रांगणमा हुने प्रतियोगताका लागि मंगलबार अबेरसम्म टिम दर्ता भैसकेको छ । गतवर्षमा केन्द्रिय सरकार तथा मुख्य राजनीतिक दलका नेताद्वारा उद्घाटन भैरहेकोमा अन्तरपालिकास्तरीय भलिबल प्रतियोगितामा यसवर्ष भने कुनै दल तथा नेता सहभागी नगराइएको पञ्चकन्या गाउँपालिकाका अध्यक्ष तेजबहादुर तामाङले बताए। उनले साझापथसंगको कुराकानीमा भने- ‘ सधै कति नेतालाई बोलाउने?यसवर्ष स्थानीय सरकारले उद्घाटन गर्द्छ।’
पुष ३ गते समापन हुने प्रतियोगितामा प्रथमलाई १ लाख, द्वितीयलाई ७५ हजार र तृतीयलाई ५० हजार रुपैयाँ पुरस्कार दिइनेछ ।