नुवाकोट तलाखु हत्याकाण्ड: शंकास्पद ४ जना प्रहरीको नियन्त्रणमा

नुवाकोट,मंसिर २१ ।  जिल्लाको शिवपुरी १ तलाखुमा भएको विभत्स हत्याका शंकास्पद ४ जनालाई प्रहरीले नियन्त्रणमा लिएको छ। मंगलबार मध्याह्नसम्म रहस्यमय बन्दै गएको घटना एकाएक अनुसन्धानका क्रममा प्रहरीले नयाँ क्लु फेला पारेको जिल्ला प्रहरी कार्यालय नुवाकोटले जनाएको छ।

शिवपुरी गाउँपालिका वडा नम्बर १ तलाखुमा सोमबार राति हत्या गरिएको पञ्चकन्या गाउँपालिका वडा नम्बर ३ का सुमन थापाका हत्यारालाई हदैसम्मको कार्वाही गर्न स्थानीयले माग गरिएको बेला प्रहरीले शंकास्पद ४ जनालाई नियन्त्रणमा लिएको हो। जिल्ला प्रहरी कार्यालयका अनुसार पक्राउ गरिएकामध्ये हत्या गरिएका सहचालक थापा काम गर्दै आएको बा२ख ६५८७ नम्बरको बसको चालक समेत रहेका छन् ।

घटनाको प्रकृति हेर्दा सुमनले काम गर्ने बा२ख ६५८७ बस भित्र रगतले लत्पतिएको गल (फलाम औजार) समेत फेला परेको छ। रोकी राखेको बसदेखि ४ सय मिटर सम्म ठाँउ ठाउँमा रगत देखिन्छ भने ४ सय मिटर दुरीमा शव भेटिएको छ । शव घोप्टो पारी ओरालो तर्फ ढल्किएकाले शवदेखि ३ मिटरसम्म रगत बगेको देखिन्छ।

जिल्ला प्रहरी कार्यालयले पक्राउ परेकाहरुको नाम सार्वजनिक गरेको छैन । साझापथसंग कुराकानीका क्रममा घटना र अनुसन्धानलाई टेवा पुर्याउन सबैको सहयोग जरुरत परेको जिल्ला प्रहरी कार्यालय नुवाकोटले जनाएको छ। घटनामा संलग्न ब्यक्ति थपघट हुनसक्ने भन्दै पक्राउ परिएकाहरुको नाम तत्काल सार्वजनिक नगरिएको प्रहरी कार्यालयले जनाएको छ।