कोरोना अपडेट: थप २४२ संक्रिमत, ४४४ जना निको

काठमाडौं,मंसिर ४ । नेपालमा पछिल्लो २४ घण्टामा २४२ कोरोना संक्रिमत थपिएका छन् । स्वास्थ्य तथा जनसंख्या मन्त्रालयले शनिबार दिएको जानकारीअनुसार विभिन्न जिल्लामा गरिएको पीसीआर र एन्टिजेन गरी ७ हजार १३६ परीक्षणमा २४२ मा कोरोना पुष्टि भएको हो ।

यससँगै नेपालमा कोरोना संक्रमितको संख्या ८ लाख १८ हजार ७८७ पुगेको छ । २४ घण्टाको अवधिमा ४४४ जना निको भएका छन् । हालसम्म निको हुनेको संख्या ७ लाख ९९ हजार ९८९ पुगेको मन्त्रालयको तथ्यांकमा उल्लेख छ ।

यस्तै २४ घण्टामा १ जनाको मृत्यु भएको छ भने हालसम्म कोरोनाबाट मृत्यु हुनेको संख्या ११ हजार ४९५ पुगेको मन्त्रालयले जनाएको छ । २४ घण्टामा १ लाख ३ हजार २०९ जनाले खोप लगाएसँगै नेपालमा पूर्ण खोप प्राप्त गर्नेको संख्या ७८ लाख ७६ हजार ७०३ रहेको छ ।