कोरोना अपडेट: संक्रमण ३५६, निको ५१८ जना
काठमाडौं,कात्तिक १८ । नेपालमा पछिल्लो २४ घण्टामा २८७ कोरोना संक्रमित थपिएका छन् । देशभर गरिएको ३ हजार २५९ पीसीआर परीक्षणबाट २८७ जना नयाँ संक्रमित थपिएको स्वास्थ्य तथा जनसंख्या मन्त्रालयले बिहीबार जानकारी दिएको हो ।
यससँगै नेपालमा कोरोना संक्रमितको संख्या ८ लाख १४ हजार ११५ पुगेको छ । यस्तै ३ हजार १२५ एन्टीजेन परीक्षणबाट ६९ जनामा पोजिटिभ देखिएको छ । पीसीआर र एन्टिजेन गरी ६ हजार ३८४ परीक्षणमा ३५६ जनामा संक्रमण देखिएको मन्त्रालयले जनाएको छ ।
यस्तै २४ घण्टामा ५१८ जना निको भएका छन् । हालसम्म नेपालमा कोरोना संक्रमणमुक्त हुनेको संख्या ७ लाख ९३ हजार ७८९ पुगेको छ । सोही अवधिमा २ जनाको मृत्यु भएको छ । यो सँगै मृत्यु हुनेको संख्या ११ हजार ४३६ पुगेको मन्त्रालयको तथ्यांकमा उल्लेख छ ।
देशभर सक्रिय संक्रमितको संख्या ८ हजार ८९० रहेको छ । हालसम्म ४४ लाख ४५ हजार १९३ पीसीआर परीक्षण भएको छ । क्वारेन्टाइनमा रहनेको संख्या ११८ रहेको छ । २४ घण्टामा ६४ हजार ३७२ ले खोप लगाएका छन् ।