टोखामा जारी फुटबल प्रतियोगिताको विजेता बन्यो साविक वडा ३ मालुङ
काठमाडौं,कात्तिक ७ । टोखा नगरपालिका वडा नम्बर १ अन्तर्गतको साबिक गाउँ बिकास समिती झोरको जारी टोलस्तरीय खेलको अन्तिम खेल सम्पन्न भएको छ। गत असोज १६ गतेदेखि सुरु भएको साविक वडास्तरीय फुटबल प्रतियोगितामा २७ गतेसम्म सेमिफाइनल अन्तर्गतको खेल भएको थियोे भने आइतबार फाइनल खेल सम्पन्न भएको छ।
फाइनल खेल अन्तर्गत मालुङ र बोडुगाउँ अर्थात साविक वडा नम्बर १ र ३ बीच रोमाञ्चक खेल भएको थियोे ।टोखास्थित भूतखेल मैदानमा सम्पन्न खेलमा बौडेगाउँलाई ० को विरुद्ध २ गोल गर्दै मालुङले प्रतियोगितामा जीत हासिल गरेको हो।
साविक वडा नम्बर १ र वडा नम्बर ३ बीच भएको फाइनल खेलमा वडा नम्बर ३ का खेलाडी निकेश महर्जन म्यान अफ दि म्याच बन्न सफल भएका छन् । टोखा नगरपालिका तथा राधाकृष्ण युवा क्लबको आयोजनामा भएको प्रतियोगितामा बिजेता टिमलाई टोखा नगरका मेयर प्रकाश अधिकारी, उपमेयर ज्ञानमाया डङोल र वडा नम्बर १ का अध्यक्ष श्रीकृष्ण अधिकारी लगायतले ट्रफी, प्रमाणपत्रसहित नगद ३० हजार प्रदान गरेका थिए ।