पहिरोले घर पुरिँदा एकै परिवारका दुई बालबालिकाको मृत्यु

इटहरी,कात्तिक २ । केहि दिनदेखि परिरहेको अविरल वर्षाका कारण गएको पहिरोले घर पुरिँदा दूई बालबालिकाको ज्यान गएको छ ।

पहिरोले घर पुरिँदा  धरान उपमहानगरपालिका वडा नम्बर १३ नागेश्वर मार्ग बस्ने निसान राईको ८ वर्षीया छोरी निसु राई र ४ वर्षीया छोरा निहान राईको मृत्यु भएको हो ।

मंगलबार दिउँसो १:४५ बजे राईको घरमाथिबाट पहिरो खसेको थियो । राईको टिनको छाना भएको एक तल्ले घर पुरिदा घरभित्र रहेका उहाँका एक छोरा र एक छोरीको मृत्यु भएको प्रहरीले जनाएको छ ।

घटनाको जानकारी पाए लगतै ईलाका प्रहरी कार्यालय धरानबाट उद्धारको लागी प्रहरी टोली त्यसतर्फ गएको थियोे । उद्धारमा खटिएको प्रहरी टोलीले दिउसो साढे ३ बजे दुईजना बच्चालाई मृत अबस्थामा फेला पारेका हुन ।