सिन्धुपाल्चोकबाट काठमाडौंका लागि छुटेको बस दुर्घटना, ३५ यात्रु घाइते
सिन्धुपाल्चोक, असोज ३१ । सिन्धुपाल्चोकबाट काठमाडौंका लागि छुटेको बस दुर्घटनामा परेको छ।लिसंखुपाखर गाँउपालिकाबाट काठमाडौँतर्फ जाँदै गरेको बा २ ख ३२६४ नम्बर को बस लामो साँघु जिरी सडक खण्ड को ६ किलो नजिकै दुर्घटना भएको हो ।
आइतबार भएको दुर्घटनामा बसमा सवार ३५ यात्रु घाइते भएको प्रहरीले जनाएको छ। जिल्ला प्रहरी कार्यालय सिन्धुपाल्चोकका सूचना अधिकारी प्रहरी नायब उपरीक्षक दक्षकुमार बस्नेतका अनुसार सहचालकसहित चार जनाको अवस्था भने गम्भीर रहेको छ। उनीहरुको थप उपचारको लागि धुलिखेल अस्पताल पठाइएको बस्नेतले बताए ।
अन्य घाइतेहरूको खाडिचौरस्थित सिन्धु सदावहार अस्पतालमा उपचार भइरहेको र सबैको अवस्था सामान्य रहेको छ । बसको ब्रेक फेल भएर दुर्घटना भएको हुनसक्ने अनुमान गरिएको जिल्ला प्रहरी कार्यालय सिन्धुपाल्चोकले जनाएको छ । काठमाडौँ-धुलिखेल सञ्चालन हुने सो बस यात्रु बोकेर काठमाडौँतर्फ आउँदै गरेको प्रहरीले जनाएको छ ।