तीन बुंदे कार्यान्वयनको माग गर्दै नेकपा नवलपरासीले दियो धर्ना

नवलपरासी,असोज १८ । विप्लव नेतृत्वको नेकपा कम्युनिस्ट पार्टीले नवलपरासीमा धर्ना एवं कोणसभा सम्पन्न गरेको छ।सरकार र नेकपा बिच भएको तीन बुँदे सहमति कार्यान्वयन गर्न दबाब स्वरुप नेकपाले जिल्ला प्रशासन कार्यालय परासी गेट अगाडि धर्ना दिएको हो।

नेकपाले जिल्ला प्रशासन कार्यालय परासी अगाडिबाट कालो ब्यानरसहितको कोणसभा र धर्ना कार्यक्रम गरेको थियो । धर्ना कार्यक्रमलाई सम्बोधन गर्दै जिल्ला सदस्य रामप्रीतले विनासर्त सम्पूर्ण नेताकार्यकर्तालाई रिहा गर्न नेपाल सरकारलाई आग्रह गरे । गैरकानुनी रुपमा पार्टीमाथि प्रतिबन्ध लगाएर तत्कालिन ओली सरकारले दमन गरेको भन्दै पक्राउ परेका सम्पूर्ण नेताकार्यकर्तालाई रिहा गर्न उनको माग थियो ।रामप्रीतले दार्चुलामा तुहिन काटेर हत्या गरेको बिषयमा सरकार मुकदर्शक भनेको र जनताको सुरक्षा बारे बोल्न नसक्ने सरकार जनपक्षीय नहुने बताउदै  एमसिसी खारेजीको समेत माग गरेका थिए।

सरकारसँग सहमति भएको लामो समय भइसक्दा पनि नेता कार्यकर्ता नछोडेको भन्दै नेकपाले धर्ना कार्यक्रमको आयोजना गरेको नेकपा सदस्य रामप्रीतले बताए।कार्यक्रमको संचालन गरेका गणेश पाठकले सहमति कार्यान्वयन नभए सरकारले जस्तोसुकै मुल्य चुकाउन तयार हुनुपर्ने चेतावनी दिए ।

तीन बुँदे सहमतिको कार्यन्वयन,पार्टीका नेताकार्यकर्तामाथि लगाइएका झुठ्ठा मुद्धा खारेज र सम्पूर्ण राजबन्दी रिहाइको माग गर्दै नेकपाले आज देशव्यापी धर्ना दिएको छ। गएको फागुन २१ गते नेपाल सरकार र नेत्रविक्रम चन्द विप्लवले नेतृत्वको नेकपाबीच ३ बुदेँ सहमति भएको थियो । सो सहमति अनुसार नेताहरुमाथि लगाइएका मुद्दाहरु खारेजी र नेताकार्यकर्ता रिहाई भएका छैनन।