चाडपर्व नजिकिँदै गर्दा घट्यो कुखुराको मासुको मूल्य

काठमाडौं,असोज ४ । चाडपर्व नजिकिँदै गर्दा ब्रोइलर कुखुराको मासुको मूल्य घटेको छ । निषेधाज्ञा खुलेर बजारमा मासुको खपत बढेसँगै प्रतिकिलो ३६० रुपैयाँसम्म पुगेको ब्रोइलर कुखुराको मासुको मूल्य अहिले घटेर प्रतिकिलो ३०० रुपैयाँमा आएको छ । महामारीको अवस्था सामान्य हुँदै जाँदा कुखुराको उत्पादन बढेको, तर खपत कम भएकाले मूल्य घटेको हो ।

महामारीको प्रभाव कम हुँदै गए पनि ठूला होटेल, रेष्टुराँ, पार्टी प्यालेसहरू राम्ररी चल्न सकेका छैनन् । यस्तै स्कुल, क्याम्पसहरू अझै बन्द रहेकाले मासुको खपत बढ्न नसकेको व्यवसायीहरू बताउँछन् । मासु व्यवसायी संघका अध्यक्ष जंगबहादुर बीसीका अनुसार सामान्य अवस्थामा काठमाडौं उपत्यकामा दैनिक ७ लाख किलो मासुको खपत हुने गरेकोमा अहिले यो परिमाण घटेर करीब ४ लाख ९० हजार किलोमा सीमित रहेको छ ।

‘सामान्यतया चाडपर्वका बेला मासुको खपत बढ्ने भएकाले मूल्य बढ्नुपर्ने हो, मूल्य घटिरहेकाले महामारीका कारण उपभोक्ताको क्रयशक्ति घटेको अनुमान गर्न सकिन्छ,’ उनले भने ।

महामारीको समयमा विक्री नहुने त्रासका कारण करीब ४० प्रतिशत कुखुरा पालक किसानले आफ्ना खोरमा कुखुरा हालेका थिएनन् । तर अहिले अवस्था सामान्य हुँदै गएपछि अधिकांश किसानले कुखुरा हालेकाले उत्पादन बढेको बताइएको छ । सम्बद्ध किसानले अहिले कुखुराको उत्पादन बढेको बताए तापनि ह्याचरी संघका अनुसार उत्पादन खासै बढेको छैन ।

संघका अनुसार बन्दाबन्दीको समयअघि सातामा ४० लाख कुखुराका चल्ला उत्पादन हुने गरेको थियो । त्यस बेलाको माग भने प्रतिसाता ३२ लाखसम्म थियो । बन्दाबन्दीको समयमा उत्पादन घटेर १२ लाखमा आइपुग्यो । अहिले उत्पादन र माग दुवै १८ लाख हाराहारीमा मात्र छ । संघका महासचिव बलराम सञ्जेलले उत्पादन बढेको हो भने चल्लाको माग पनि बढ्नुपर्ने बताए । ‘सामान्य अवस्थाको तुलनामा चल्लाको माग अझै पनि १४ लाख कम छ, त्यसैले उत्पादन बढेर मासुको मूल्य घटेको भन्दा पनि उपभोक्ताको क्रयशक्ति नै कमजोर भएर माग घटेको हो,’ उनले भने । उपभोक्ताले अन्य अत्यावश्यक खाद्यवस्तुको आवश्यकता पूरा भएपछि मात्र मासुको माग गर्ने भएकाले अहिले धरै उपभोक्ताको भान्सामा मासुको खपत घटेको उनको अनुमान छ । आर्थिक अभियानबाट