नवलपरासी पूर्वमा पहिरो : एकै घरका ३ जना बेपत्ता

नवलपुर,भदौ ११ । शुक्रबार परेको अविरल वर्षाका कारण नवलपरासी पूर्वमा पहिरो जाँदा एकै घरका तीन जना बेपत्ता भएका छन्। शुक्रबार हुप्सेकोट गाउँपालिका-४ माथिल्लो चारघरेमा पहिरो आउँदा ५० वर्षीया धनमाया पुलामी सहित उनकी नातिनीहरू ७ वर्षीया भूमिसरा पुलामी र ६ वर्षीया देउमाया पुलामी बेपत्ता भएका हुन्।

प्रहरीका अनुसार ५० वर्षीय हस्तबहादुर पुलामीको घरलाई पहिरोले पुरेकाे थियाे । पहिरोमा पुरिएका हस्तबहादुरलाई भने सकुशल उद्धार गरिएको छ।बेपत्ता भएका तीन जनाको खोजीका लागि जनपद र सशस्त्र प्रहरीका १६ जना प्रहरी खटाइएको छ।

पहिराे बिहान करिब २ बजे गएको थियो। पहिरोमा पुरिएर घाइते भएका पुलामीको मध्यविन्दु जिल्ला अस्पताल नवलपुर डण्डामामा उपचार भइरहेको प्रहरीले जनाएको छ।