मकवानपुर मालपोतमा सेवा लिन लाइन बसेकी बृद्धाको मृत्यु

हेटौंडा,साउन २१ । हेटौंडा -२ मा रहेको  मालपोत कार्यालय मकवानपुरमा सेवा लिन गएकी एक बृद्धाको लाइन बस्ने क्रममा मृत्यु भएको छ ।

मृत्यु हुनेमा मकवानपुरगढी गाउँपालिका वडा नम्बर ६ सामरीकी ७८ पञ्चमाया गौतम रहेकी छिन् । जग्गाको नामसारी गर्न गएकी गौतम पालो कुर्ने क्रममा लाइनमा बसेकी थिइन् ।

दमको रोगी उनको लाइनमा मृत्यु भएपछि केहीबेर मालपोतमा खैलाबैला भएको थियो ।कालगतीले मृत्यु भएको भन्दै शव आफन्तले लिएर गएको जिल्ला प्रहरी कार्यालय मकवानपुरका निमित्त प्रहरी प्रवक्ता प्रहरी निरीक्षक देवेन्द्र दासले जानकारी दिए ।