चोरीको मोटरसाईकल सहित तीन जना पक्राउ

काठमाडौं,साउन १७ । महानगरीय ट्राफिक प्रहरी महाशाखाले भक्तपुरबाट  चोरीका मोटरसाइकल सहित तीन  जनालाई पक्राउ गरेको छ ।  सादा पोशाकमा खटिएका ट्राफिक प्रहरीले उनिहरुलाई पक्राउ गरेको हो ।

पक्राउ पर्नेमा भक्तपुर सरस्वतीखेलका बासुदेव खड्काको आफ्नै घर अगाडिबाट २०७६ सालमा हराएको उक्त मोटरसाइकल सहित रामेछाप घर भई भक्तपुर बस्ने बर्ष १९ को दिपेन्द्र भुजेल र ताप्लेजुङ्गका १९ बर्षे बिशेष लिम्बु रहेको  ट्राफिक प्रहरी प्रमुख एसएसपी जनक भट्टराईले बताए ।

बास्तबिक नं बा ९७प १३०५ भएको कालो, रातो रङको १५० सी.सी.को उक्त पल्सर मोटरसाइकलको नम्बर परिबर्तन गरि बा९५प ४१६८ भएको अबस्थामा  पक्राउ गरिएको महाशाखाले जनाएको छ ।ट्राफिक प्रहरीले थप अनुसन्धान गरि पशुपति क्षेत्रबाट हराएको किर्तिपुर बस्ने प्रशान्त रावलको बा ९६ प ८८३६ नम्बरको कालो एनएस पल्सरको बास्तबिक नम्बर परिबर्तन गरि बा ९१ प ८६७२ नम्बर प्रयोग गरेको अबस्थामा धनुषा मिथिलाका २१ बर्षिय बिकल थापालाई समेत भक्तपुरबाटै नियन्त्रणमा लिएको हो । पक्राउ परेको मोटरसाईकल सहित तीनै जनालाई थप अनुसन्धान एव कानूनी कार्बाहीको लागी प्रहरी बृत्त ठिमीमा बुझाएको समेत ट्राफिक महाशाखाले जनाएको छ ।

गत आर्थिक वर्षमा मोटरसाइकल चोरीमा संलग्न ५१ जनालाई पक्राउ गरी चोरी मुद्दा चलाउन विभिन्न प्रहरी ईकाइमा पठाएको छ भने हराएका ३९७ वटा मोटरसाइकल सम्बन्धित धनीलाई जिम्मा लगाएको महाशाखाले जनाएको छ ।