पूजाको प्रसाद खाँदा सिन्धुपाल्चोकमा एकै गाउँका २८ भन्दा बढी बिरामी
सिन्धुपाल्चोक,साउन १७ । पूजाको प्रसाद खाँदा सिन्धुपाल्चोकमा एकै गाउँका २८ भन्दा बढी बिरामी परेका छन् । मेलम्ची नगरपालिका–११ चालिसेगाउँ चापाबोटमा पूजाको प्रसाद खाँदा २८ जना बिरामी भएका हुन ।
गत साउन १४ गतेको पूजामा सहभागीमध्ये २८ जनालाई एउटै प्रकारको झाडापखाला लागेको मेलम्ची नगरपालिकाका उपप्रमुख भगवती नेपालले जानकारी दिइन्।
उनले सबैलाई स्वास्थ्यचौकीमा ल्याउन सम्भव नभएकाले बिहान स्वास्थ्यकर्मीसहितको टोली लगेर उपचार गरेर फर्केको जानकारी दिइन्। बिरामीमध्ये तीन जनालाई स्वास्थ्य केन्द्र मेलम्चीमा ल्याइएको छ । अन्यको स्वास्थ्य अवस्था सामान्य रहेको र ‘फुडपोइजन’का कारण झाडापखाला लागेकाले ४८ घण्टासम्म सबै जना ठिक भइसक्ने स्वास्थ्यकर्मीको भनाइ छ ।