बस पल्टिँदा एकको मृत्यु, १३ यात्रु घाइते

लाहान,साउन ६ । सिरहाको धनगढीमाई नगरपालिका–५ सन्तनगरमा गए राति यात्रुबाहक बस दुर्घटनामा परेको थियोे। जिरोमाइल–बडियारपट्टी सहायक सडकअन्तर्गत सन्तनगरमा भएको दुर्घटनामा परी एक जना यात्रुको मृत्यु भएको छ भने १३ यात्रु घाइते भएका छन् ।

बा२ख ७१ नम्बरको सो बस जिरोमाइलबाट बडियारपट्टी जाने क्रममा पल्टिँदा बसमा सवार बरियारपट्टि गाँउपालिका–३ निवासी ३५ वर्षीय गणेश मुखियाको मृत्यु भएको स्थानीय प्रहरीले उल्लेख गरेको छ ।

बस पल्टिनुको कारण तीव्रगतिमा चलाइएको र बस अनियन्त्रित भई दुर्घटना भएको प्रहरीले जनाएको छ। दुर्घटनामा परी घाइते भएका १३ जनाको स्थानीय स्वास्थ्य संस्थामा उपचार भइरहेको प्रहरीले जनाएको छ । दुर्घटनालगत्तै चालक फरार रहेकाले खोजीकार्य जारी रहेको जनाएको छ ।