कोरोना अपडेट: ३१०८ संक्रमित थप, २५ जनाको मृत्यु
काठमाडौं,साउन ५ । नेपालमा बितेको २४ घण्टामा ३ हजार १०८ जना कोरोना संक्रमित थपिएका छन् । स्वास्थ्य मन्त्रालयले दिएको पछिल्लो तथ्यांक अनुसार पछिल्लो २४ घण्टामा १३ हजार १३५ जनाको पीसीआर र एन्टिजेन परीक्षण गर्दा ३ हजार १०८ जनामा कोरोना संक्रमण पुष्टि भएको उल्लेख छ ।
मन्त्रालयका अनुसार ८ हजार ८३६ जनाको आरटी पीसीआर विधिबाट परीक्षण गर्दा २ हजार २०२ जना र ४ हजार २९९ जनाको एन्टिजेन विधिबाट परीक्षण गर्दा ९ सय ६ जनामा कोरोना संक्रमण पुष्टि भएको हो ।यससँगै नेपालमा कोरोना भाइरस संक्रमितको कुल संख्या ७ लाख २१ हजार ६१७ पुगेको छ ।
कोरोना भाइरस (कोभिड–१९) को संक्रमणबाट पछिल्लो २४ घण्टामा देशभर १ हजार ५९५ जना निको भएर घर फर्किएका छन् । योसँगै नेपालमा कोरोना संक्रमणमुक्त हुनेहरुको संख्या ६ लाख ३४ हजार ९२७ पुगेको छ ।
सोही समयावधिमा थप २५ संक्रमितको मृत्यु भएको छ । हालसम्म नेपालमा कोरोना संक्रमणबाट मृत्यु हुनेको संख्या ९ हजार ६०७ पुगेको छ ।