मुस्ताङमा ट्रक दुर्घटना, दुई जनाको मृत्यु, पाँच घाइते
मुस्ताङ,साउन ३ । हिमालपारिको जिल्ला मुस्ताङमा ट्रक दुर्घटना भएको छ। जिल्लाको घरपझोङ गाउँपालिका– ५ ठिनीबाट ढुम्बातर्फ जांदै गरेको ग १ ख ६८५२ नम्बरको ट्रक दुर्घटनामा परेको हो। सो दुर्घटनामा परि दुई जनाको मृत्यु भएको छ भने पाँच जना घाइते भएका छन् ।
आइतबार बिहान सदरमुकाम जोमसोमबाट ठिनी हुँदै ढुम्बातर्फ जाँदै गरेको ट्रक ठिनी खोलाको अस्थायी पुलमा दुर्घटना भएको थियो । ट्रक दुर्घटनामा परि गोकुलगंगा गाउँपालिका–१, रामेछापका का ३८ वर्षीय चित्रबहादुर श्रेष्ठ र २६ वर्षिय मनिका श्रेष्ठको घटनास्थलमै मृत्यु भएको जिल्ला प्रहरी कार्यालय मुस्ताङका इन्सपेक्टर आशिष अधिकारीले बताए ।
इन्सपेक्टर अधिकारीका अनुसार ढोरपाटन नगरपालिका–५ बागलुङका २२ वर्षिय सुनिल घर्ति, २५ वर्षिय लुद्रबहादुर कामी, पर्वत जिल्लाको जलजला गाउँपालिका–४ का १८ वर्षिय दिनेश दर्जी, ओखलढुङ्गा जिल्लाको खिन्चीदेम्बा गाउँपालिका–७ का २९ वर्षिय दावा शेर्पा र नवलपरासीको त्रिवेणी गाउँपालिका–३ का शिवराम ठाडा घाइते भएका छन् । घाइतेहरुको जोमसोम अस्पतालमा उपचार भइरहेको प्रहरीले जनाएको छ ।