धादिङमा ट्रक र मोटरसाइकल ठोक्किँदा नुवाकोटका बाबुछोराको ज्यान गयो
नुवाकोट, असार २९ । धादिङ जिल्लामा ट्रक र मोटरसाइकल एकाअर्कासंग ठोक्किँदा नुवाकोटका बाबुछोराको ज्यान गएको छ। जिल्लास्थित थाक्रे गाउँपालिका–६ महादेवबेँशीमा ट्रक र मोटरसाइकल ठोक्किँदा मोटरसाइकलमा सवार नुवाकोट विदुर नगरपालिका–१३ का नारायण शिवभक्ति र उनका १० वर्षीय छोरा आर्यन शिवभक्तिको ज्यान गएको जिल्ला प्रहरी कार्यालय धादिङका प्रमुख महेन्द्र खड्काले बताए ।
नौबिसेबाट मलेखुतर्फ जाँदै गरेको ना४ख ९४४ नम्बरको ट्रकले विपरीत दिशाबाट आउँदै गरेको बा ७३ प २१७६ नम्बरको मोटरसाइकललाई ठक्कर दिँदा बालकको घटनास्थलमै मृत्यु भएको छ भने नारायणको ट्रमा सेन्टरमा उपचारको क्रममा मृत्यु भएको हो ।
दुर्घटनापछि सडकमा लडेर घाइते भएका बालकको ट्रकले पछि हटाएर किच्दा मृत्यु भएको प्रत्यक्षदर्शी स्थानीयहरुले बताएका छन् । दुर्घटनामा घाइते अर्का एक जनाको उपचारका लागि ट्रमा सेन्टरमा पठाइएको प्रहरीले जनाएको छ । दुुर्घटनापछि भाग्दै गरेको ट्रकलाई प्रहरीले कोइराले भन्ने स्थानबाट नियन्त्रणमा लिएको थियो ।