बजारमा तयारी कपडाको अभाव हुँदै
काठमाडौं,असार २४ । पछिल्लो समय बजारमा तयारी लत्ताकपडाको अभाव देखिन थालेको छ । कोरोना महामारीका कारण व्यापारीहरू कपडा खरीदका लागि चीन जान नपाएपछि बजारमा यसको अभाव शुरू भएको हो । २०६७ को चैतपछि नेपाली व्यापारी व्यापारिक प्रयोजनमा चीन जान पाएका छैनन् ।
गर्मी मौसमका लागि आवश्यक पर्ने तयारी कपडाहरू हाफपाइन्ट, टिसर्ट, ट्राउजर लगायतको स्टक सकिन थालेको व्यापारीहरूले बताएका छन् । ‘पहिलो बजारमा लुगा नै कम छन्, त्यसमाथि उपभोक्ताले आफूले खोजेको डिजाइन तथा फेसनको लुगा नपाउने समस्या बढेको छ,’ भृकुटीमण्डपमा तयारी कपडाको व्यापार गर्ने राजेश लामाले बताए ।
बजार खुलेर मानिसको आवतजावत बढेसँगै उपभोक्ताहरू आवश्यक लत्ताकपडाको खोजीमा बजार धाउन थालेका छन् । तर आफूले खोजेको लत्ताकपडा नपाउँदा उनीहरू खाली हात फर्किनु परेको उनले बताए ।
चीन सरकारले नेपालमा कोरोनाको महामारी बढेकाले चीन प्रवेश गर्न व्यापारीलाई भिसा नदिँदा समस्या आएको लामो समयदेखि चीनबाट सामान आयात गर्दै आएका राष्ट्रिय व्यापार संघ न्यूरोडका कोषाध्यक्ष रामचन्द्र पराजुलीले बताए । उनका अनुसार एक वर्षभन्दा बढी समयदेखि नेपाली व्यापारी सामान खरीदका लागि चीन जान पाएका छैनन् ।
शुरूशुरूमा चीन जान नपाए पनि व्यापारीले अनलाइनबाटै लत्ताकपडाको डिजाइन छनोट गरी अर्डर गर्दै आएका थिए । तर, यसरी अर्डर गर्दा कहिले नक्कली सामान पर्ने त कहिले एउटा सामान मगाएको ठाउँमा अर्कै आउने समस्या बढेकाले व्यापारीले अहिले अनलाइन अर्डर गर्न बन्द गरेको उनले सुनाए ।
पछिल्लो समय अनलाइन सामान अर्डर गर्दा व्यापारीहरूलाई पैसाको कारोबारमा पनि समस्या देखिएको छ । यसअघि व्यापारीले अनलाइनमार्फत सामान अर्डर गर्दा हुन्डीबाट पैसा पठाउने गर्थे । अहिले चीन सरकारले त्यसमा कडाइ गरेको छ ।
एकातर्फ सामान खरीदका लागि व्यापारी चीन जान पाएका छैनन् भने अर्काेतर्फ नाकामा हुने असहजताका कारण एजेन्टमार्फत मगाइएका सामान पनि महीनौंसम्म नाकामै रोकिँदा समस्या झन् बढेको छ । अहिले पनि रसुवागढी नाकामा खाद्यान्न, फलफूल लगायत वस्तु बढी भित्रिने र लत्ताकपडा लगायत सामान निकै न्यून मात्रामा आउने गरेको रसुवागढी भन्सार प्रमुख रामप्रसाद रेग्मीले बताए ।
उनका अनुसार अहिले फलफूल बाहेकका सामग्री दैनिक ५ गाडी मात्र नेपाल प्रवेश गर्न पाउँछन् । कुनै दिन त त्यही पनि प्रवेश गर्न नपाउने समस्या भएको उनले बताए । आर्थिक अभियानबाट