पाल्पामा टिपर दुर्घटना, चालकको मृत्यु

बुटवल,असार २३ । पाल्पाको चरचरेमा टिपर दुर्घटना हुँदा चालकको मृत्यु भएको छ ।सिद्धार्थ राजमार्ग अन्तरगतको बुटवल पाल्पा खण्डको चरचरेमा टिपर दुर्घटना हुँदा पाल्पा पूर्वखोला गाउँपालिका–५ बिरकोटका २६ वर्षीय सुदिप गैरेको मृत्यु भएको हो ।

दुर्घटनामा गम्भीर घाइते भएका गैरेको उपचारका लागि लुम्बिनी मेडिकल कलेज तानसेन लैजाँदै गर्दा बाटोमै मृत्यु भएको लुम्बिनी प्रदेश ट्राफिक प्रहरी कार्यालय बुटवलका प्रवक्ता डीएसपी डिल्लीनारायण पाण्डेले बताए ।

चुनढुंगा बोकेर बुटवलतर्फ आउँदै गरेको लु २ ख ८२० नम्बरको टिपर १५० मिटर तल खसेर दुर्घटना भएको पाण्डेले जानकारी दिए । दुर्घटनाबारे अनुसन्धान भइरहेको प्रहरीले बताएको छ।