रोल्पामा पहिरोमा परी एकै परिवारका ३ जनाको मृत्यु
रोल्पा,असार ९ । रोल्पामा पहिरोमा पुरिएर एकै परिवारका तीन जनाको मृत्यु भएको छ। रोल्पा नगरपालिका-९ ह्वामा बस्ने ४० वर्षीय टिका सिँ बुढा मगरको घरमा मंगलबार राति पहिरो आउँदा ३ जनाको मृत्यु भएको प्रहरीले जनाएको छ ।
मृत्यु हुनेहरुमा टिका सिँ कि आमा ८६ वर्षीया कर्तिमा बुढा, बुहारी १८ वर्षीया सुशिला बुढा मगर र छोरी १५ वर्षीया श्यामकला बुढा रहेका छन् । पहिरोका कारण घर पूर्णरुपमा क्षति भएको छ ।पहिरोमा परी टीकासिंह, उनकी पत्नी सुनमाया र ९ वर्षका छोरा शक्तिमान घाइते भएका हुन् । वर्षा भइरहेका बेला टीकासिंहको दुई तले घर भत्किएको हो।
उक्त स्थानमा पहिरो गएको भन्ने खबर प्राप्त हुनासाथ जिल्ला प्रहरी कार्यालय रोल्पाबाट खटिएको प्रहरीले आवश्यक उद्दार कार्य गर्नुका साथै यस सम्बन्धमा थप अनुसन्धान गरिरहेको छ ।