रुपन्देहीमा निषेधाज्ञा थप, सार्वजनिक सवारीमा जोरबिजोर

रुपन्देही,असार ७ । रुपन्देहीमा एक साता निषेधाज्ञा थपिएको छ।जिल्ला कोभिड-१९ संकट व्यवस्थापन समितिको आज बसेको बैठकले संक्रमण दर घट्न थालेको निष्कर्षसहित केही खुकुलो बनाउने निर्णय गरेको छ ।

निषेधाज्ञाको नयाँ व्यवस्था अनुसार सार्वजनिक सवारीसाधन सञ्चालनमा जोरबिजोर बनाइने भएको छ। महोत्सव, जात्रा,सभा जुलुसलगायतका भीडभाड हुने क्रियाकलापमा भने बन्देज गरिएको छ ।

त्यस्तै सबै प्रकारका सभा, पार्टी प्यालेस, होटेल, रेस्टुरेन्ट, सिनेमा हल, सेमिनार, तालिम, गोष्ठी, सम्मेलन, सैलुन, मनोरञ्जन स्थल, व्युटिपार्लर र स्विमिङपुल स्पा, समूहमा खेल्ने खेलकुद, जिमखाना आदि सञ्चालन गर्न पाइने छैन । आन्तरिक नित्य पुजाबाहेकका सबै धार्मिक साँस्कृतिक गतिविधिहरु सञ्चालन तथा जमघटलाई पनि रोक लगाएको छ । त्यस्तै शैक्षिक संस्थाहरुले भौतिक उपस्थितिमा पठनपाठन तथा परीक्षाहरु संचालन गर्न पनि निषेध गरेको छ ।