देशभर हालसम्म ७५० भन्दा बढी पत्रकार सङ्क्रमित, १३ जनाको मृत्यु
काठमाडौ,जेठ २ । कोरोना संङक्रमणबाट हालसम्म देशभर ७५० भन्दा बढी पत्रकार सङ्क्रमित भएका छन् ।
कोरोनाकै कारण हालसम्म १३ पत्रकारको निधन भएको नेपाल पत्रकार महासङ्घले जनाएको छ ।
पछिल्ला केही दिनयता कोरोना सङ्क्रमणको दर बढिरहेकाले कोरोना सङ्क्रमणको चुनौतीपूर्ण यस अवस्थामा महासङ्घले सम्भावित जोखिमको ख्याल गरी सम्पूर्ण स्वास्थ्य सुरक्षाका उपाय अवलम्बन गर्दै पेशागत कर्ममा जुट्न सबै पत्रकारमा अपिलसमेत गरेको छ ।
महासङ्घले च्यानल नेपाल प्रतिष्ठान शाखाका अध्यक्ष शान्तिराम कार्कीको कोरोना सङ्क्रमणका कारण ३४ वर्षको अल्पायुमै भएको असामयिक निधनप्रति दुःख व्यक्त गरेको छ । महासंघका महासचिव रोशन पुरीले आइतबार एक विज्ञप्ति जारी गरी स्व पत्रकार कार्कीप्रति श्रद्धाञ्जलि अर्पण गर्दै दिवङ्गत आत्माको चिरशान्तिको कामना गरेका छन् ।
