कोरोना संक्रमणबाट विदेशमा थप ३ नेपालीको मृत्यु

काठमाडौं माघ १८ ।

कोरोना भाइरसको संक्रमणबाट विदेशमा थप ३ जना नेपालीको निधन भएको छ।

कोरोना संक्रमणबाट बेलायतमा थप तीन जनाको मृत्यु भएको हो । गैरआवासीय नेपाली संघका अनुसार हालसम्म विदेशमा कोरोना संक्रमणका कारण निधन हुने नेपालीको संख्या ३ सय ३० जना पुगेको छ।

गैरआवासीय नेपाली संघअन्तर्गतको स्वास्थ्य समितिका संयोजक सञ्जिव सापकोटाका अनुसार शनिबार साँझसम्म विभिन्न ५० देशमा रहेका ५८ हजार ६ सय ९५ जना नेपालीमा कोरोना संक्रमण पुष्टि भएको छ। तीमध्ये ५५ हजार ७ सय ९३ जना कोरोना संक्रमण मुक्त भइसकेको संघले जानकारी दिएको छ।

गैरआवासीय नेपाली संघको स्वास्थ्य समितिका अनुसार यो साता बेलायत, मलेसिया, साउदी अरब, पोर्चुगल र नाइजेरियामा रहेका थप नेपालीहरुमा कोरोना संक्रमण पुष्टि भएको छ।