दाहाल र नेपालबीचको सम्बन्ध सिनेमामा देखिने प्रेमजस्तै हो : प्रधानमन्त्री ओली
काठमाडौं माघ ८ ।
प्रधानमन्त्री तथा नेकपाका अध्यक्ष केपी शर्मा ओलीले पुष्पकमल दाहाल र माधवकुमार नेपालबीचको सम्बन्धलाई सिनेमामा देखिने प्रेमजस्तो टिप्पणी गरेका छन्।
आफूपक्षीय पत्रकारहरुको भेलामा दाहाल–नेपाललाई लक्षित गर्दै ओलीले भने, ‘कोहीकोहीले तमासा गरिरहेका छन्। हुँदै नभएको प्रेमलाई पनि औधी प्रेम भए जस्तो देखाइरहेका छन्। सिनेमामा हिरो र हिरोइनबीच प्रेम भएको देखाए पनि वास्तवमा भएको हुँदैन। उहाँहरु त्यस्तै नाटक गरिरहनु भएको छ।’
ओलीले आफूले नेतृत्व गरेको नेकपा रातो झण्डा फहराउने वाला पार्टी भएको बताए। ओलीले भने, ‘हामी रातो झण्डा फहराउने वाला हौं, पेरिसडाँडामा जस्तो कालो झण्डा फहराउने वाला हैनौं। सडकमा रातो झण्डा बोक्नेवाला हौं, कालो झण्डा बोक्नेवाला हैनौं। राता बेलुन उडाउनेवाला हौं, काला बेलुन उडाउनेवाला हौं।’
ओलीले थपे, ‘कसैप्रति प्रतिशोधको भावना छैन, आवेग–उत्तेजना छैन। कसैप्रति आग्रह–पूर्वाग्रह छैन। हाम्रो गन्तव्य स्पष्ट छ।’