उखु किसानको आन्दोलन स्थगित, तीन साताभित्र वक्यौता भुक्तानी हुने
काठमाडौं, पुस १४ । लामो समयदेखि माइतीघर–बानेश्वर सडकमा आन्दोलनरत उखु किसान र सरकारबीच चार बुँदे सहमति भएको छ । सहमतिसँगै उखु किसानको आन्दोलन स्थगित भएको छ ।
उद्योग, वाणिज्य तथा आपूर्ति मन्त्रालयमा सोमबार भएको वार्तामा सरकारले तीन साताभित्र उखु किसानको सबै बक्यौता भुक्तानी रकम उपलब्ध गराउने प्रतिबद्धता जनाएपछि आन्दोलन स्थगित भएको हो ।
चार बुँदे सहमतिमा उखु किसानको बक्यौता भुक्तानी नगर्ने चिनी मिल्सका सञ्चालकको सम्पत्ति रोक्का राख्ने, बैंक खाता बन्द गर्ने, थुनुवा पुर्जी जारी गर्नेलगायतका कानुनी कारबाहीको प्रक्रिया अघि बढाउने उल्लेख छ ।
यसैगरी उखु किसान र चिनी उद्योगसँग सम्बन्धित अन्य समस्याबारे अध्ययन गरी १२० दिनभित्र सुझाव पेस गर्न संयुक्त प्राविधिक समिति गठन गर्ने सहमति भएको छ । समितिमा उद्योग, वाणिज्य तथा आपूर्ति मन्त्रालय, गृह, कषि तथा पशुपन्छी विकास मन्त्रालय र अर्थ मन्त्रालयका एक एक जना प्रतिनिधि, उखु किसानबाट तीन जना, चिनी उत्पादक संघका एक जना र आन्दोलनरत उखु किसान संघर्ष समितिका दुई जना प्रतिनिधि रहने उल्लेख छ ।
सहमतिअनुसार अब उखु किसानले सरकारले निर्धारण गरेको समर्थन मूल्य पाउनेछन् । समर्थन मूल्य र सरकारी अनुदान रकम नपाएको सम्बन्धमा सत्यतथ्य यकिन गरी सुझाव पेस गर्ने निर्णय भएको छ।
यो समाचार राजधानी दैनिकमा प्रकाशित छ ।