एकैदिन कोरोनाबाट २९ जनाको मृत्यु, २४ घण्टामा १४ सय ७४ संक्रमित
काठमाडौं मंसिर १५ । नेपालमा कोरोना भाइरस संक्रमणबाट एकैदिन २९ जनाको मृत्यु भएको छ ।
स्वास्थ्य तथा जनसंख्या मन्त्रालयले पछिल्लो २४ घण्टामा २९ जनाको मृत्यु र १४ सय ७४ जना संक्रमित थपिएको जानकारी सोमबार दिएको हो । यो सँगै नेपालमा कोरोनबाट मृतकको संख्या १५ सय ८ पुगेको छ । त्यस्तै संक्रमितको संख्या २ लाख ३३ हजार ४ सय ५२ पुगेको मन्त्रालयका प्रवक्ता जागेश्वर गौतमले जानकारी दिए ।
त्यस्तै सोही अवधिमा १९ सय ३१ जना कोरोनामुक्त भएका छन् । यो सँगै कोरोनालाई पराजित गर्नेको संख्या नेपालमा २ लाख १४ हजार ५ सय २१ पुगेको छ । हाल नेपालमा सक्रिय संक्रमितको संख्या १७ हजार ४ सय २३ पुगेको छ ।
हालसम्म पीसीआर विधिबाट परीक्षण भएको संख्या १७ लाख ३७ हजार ७ सय ४७ पुगेको छ । क्वारेन्टाइनमा भने ५ सय ३५ जना रहेका छन् ।