‘कोठामा बस्ने मानिसले तिरेको पैसाले घरबेटीको गर्जो टर्छ, उनिहरुलाई पराइको व्यवहार नगरौं
काठमाडौं असोज १० ।
सरकारले बाहिरी जिल्लाबाट काठमाण्डौ उपत्यकामा आएका व्यक्तिलाई पीसीआर परीक्षणका लागि दबाब नदिन घरबेटीलाई आग्रह गरेको छ ।
आफ्नो कामका लागि उपत्यकामा आएकाहरुलाई घरबेटी, छिमेकी तथा समुदायका व्यक्तिले पीसीआर परीक्षणका लागि बाध्य बनाउने गरेको गुनासो आएको भन्दै सरकारले यस्तो नगर्न आग्रह गरेको हो ।
स्वास्थ्य मन्त्रालयको नियमित पत्रकार सम्मेलनमा प्रवक्ता डा. जागेश्वर गौतमले कोठामा बस्ने मानिस पनि त्यो घरको सदस्य जस्तै हुने र उनीहरुले तिरेको पैसाबाट घरबेटीको गर्जो टर्ने गरेकोले अप्ठ्यारो अवस्थामा पराइको व्यवहार नगर्न आग्रह गरे ।
उहाँले कोरोना भाइरस शरीरमा प्रवेश गरेको पाँच दिनपछि परीक्षण गर्दा मात्र नतिजा थाहा हुने भन्दै यात्रा गर्नासाथ गरिएको परीक्षणको अर्थ नहुने बताए । उनले आफ्नो घर वा टोलछिमेकमा आउने व्यक्तिलाई दुई हप्तासम्म कोठामा छुट्टै बस्ने वातावरण दिएर लक्षण देखिएमा मात्र परीक्षण गर्न लगाउन आग्रह गरेका छन् ।
अहिले पीसीआर परीक्षणका लागि रातभरि झरीमा रुझ्दै लाइन बस्नु परेको प्रति दु ख व्यक्त गर्दै प्रवक्ता गौतमले यस्तो अवस्था आउन नदिन महामारीमा एकले अर्कोलाई सहयोग गर्नुपर्ने बताए । उनले कसैलाई कोरोना सङ्क्रमणसँग मिल्दो लक्षण देखिएमा वडा कार्यालयलाई खबर गर्न आग्रह गर्दै वडा कार्यालयले परीक्षणलगायत आवश्यकता अनुसार आइसोलेशनको व्यवस्था गर्ने बताए ।
प्रवक्ता गौतमले अहिले यात्रा गर्दा कोरोना सङ्क्रमणको जोखिम उच्च हुने भएकोले यो बेलामा सकेसम्म यात्रा नगर्न अनुरोध गरे ।