सिन्धुपाल्चोकको बाह्रबीसे पहिरोमा मृत्यु हुनेको संख्या ७ पुग्यो, अझै २४ बेपत्ता
सिन्धुपाल्चोक भदौ २८ । जिल्लाको बाह्रबीसे नगरपालिका–७ मा दुइटा बस्ती बगाउने गरी शनिबार राति खसेको पहिरोमा मृत्यु हुनेको संख्या ७ पुगेको छ । अझै २४ जना बेपत्ता छन् ।
प्रहरी नायब उपरीक्षक प्रकाश सापकोटाका अनुसार अहिलेसम्म मृत्यु हुनेमा नागपुजेका ६२ वर्षीया भक्तिमाया श्रेष्ठ र ९८ वर्षीया ट्याक्सी शेर्पा तथा भिरखर्कका २३ वर्षीया जुनु विक, २४ वर्षीय शुकलाल विक, ८ वर्षीय सन्देश विक, ६० वर्षीया सर्किनी नेवार र ६५ वर्षका धनलाल विक छन् । शनिबार राति ३ बजेतिर बस्तीमाथिको घट्टे खोला उर्लिंदा खसेको पहिरोमा भिरखर्कका १० र नागपुजे गाउँका सात घर पुरिएका छन् ।
बाह्रबीसे–७ का वडाध्यक्ष मीनबहादुर श्रेष्ठका अनुसार पहिरोले जमिन भास्सिएर अझ ठूलो पहिरो आउँदा भिरखर्कको माथिल्लो विक टोल, नेवार टोल, तामाङ टोलको नामोनिसान मेटिएको छ ।
माथिल्लो टोलका घाइतेलाई दुई घण्टापछि मात्रै उद्धार गरेर बाह्रबीसे प्राथमिक स्वास्थ्य केन्द्रमा ल्याइएको छ । श्रेष्ठका अनुसार पहिरोमा अझै २४ जना बेपत्ता छन् । उनीहरूको नेपाली सेना, सशस्त्र र जनपद प्रहरीको संयुक्त टोलीले खोजी गरिरहेको छ ।
पल्लोछेउदेखि वारि भिरखर्कसम्म पहिरो खसिरहेकाले शोकाकुल स्थानीय तल्लो भेगमा बसाइँ सर्दैछन् । भिरखर्क र नागपुजेका गरी ५८ परिवारलाई सुरक्षित स्थानतिर लगिँदै छ । उद्धारकार्यमा खटिइरहेका इलाका प्रहरी बाह्रबीसेका प्रहरी निरीक्षक नवराज न्यौपानेले बाह्रबीसे प्राथमिक स्वास्थ्य केन्द्र लगिएका भिरखर्कका तीन घाइतेलाई काठमाडौं रिफर गरिएको जानकारी दिए ।
सभामुख अग्नि सापकोटा आइतबार सुरक्षाकर्मीसहित घटनास्थल पुगेर स्थानीयको अवस्था र उद्धारकार्यबारे जानकारी लिएका छन् ।
शोकाकुल स्थानीयलाई आश्वासन दिँदै उनले पहिरो आउनुको कारण र थप जोखिमको अवस्थाबारे स्थानीय जनप्रतिनिधिसँग छलफल गरेका थिए ।