अन्ततः बन्द भयो बीबीसीको हिन्दी रेडियो सेवा
एजेन्सी।बीबीसीको हिन्दी रेडियो सेवा अन्ततः बन्द भएको छ।८० वर्षदेखि निरन्तर प्रसारण हुँदै आएको बीबीसी हिन्दी रेडियो ३१ जनवरीदेखि बन्द भएको हो । बीबीसी हिन्दी रेडियो सेवाले आफ्नो अन्तिम प्रसारण शुक्रबार साँझ साढे ७ बजे भयो ।
कुनै समयमा बीबीसी हिन्दी सेवाको ‘दिनभर’, ‘नमस्कार भारत’ लगायतका कार्यक्रम निकै लोकप्रिय थिए ।बीबीसीले आर्थिक संकटका कारण पटक पटक कर्मचारीहरु कटौती गर्दै आएको छ । बीबीसी हिन्दी रेडियोको सेवा बन्द हुनुलाई प्रमुख कारण पनि त्यही मानिएको छ ।
तर स्रोताको संख्या घट्दै गएको भन्दै विश्व हिन्दीको सर्टवेभ रेडियो प्रसारण बन्द गरिएको भारतीय मिडियाहरुले उल्लेख गरेका छन् ।
अन्तिम बुलेटिन प्रसारण गर्नुअघि बीबीसी हिन्दी रेडियोका प्रमुख प्रस्तोता राजेश जोशीले ८० वर्षे इतिहास बोकेको रेडियो सेवा बन्द हुँदा आफू भावुक बनेको बताए । अन्तिम कार्यक्रम प्रसारण सकेपछि जोशीले स्टुडियोको माइक ढोगेका थिए । यो दृश्यले धेरैलाई भावुक बनाएको छ ।
बीबीसी हिन्दी रेडियोको पहिलो प्रसारण ११ मे १९४० मा भएको थियो । दोस्रो विश्वयुद्धमा लड्ने भारतीय सैनिकको हालखबर परिवारसम्म पुर्याउने गतिलो माध्यम रेडियोको थियो । त्यतिबेला १० मिनेटको समाचार बुलेटिन प्रसारण हुन्थ्यो । सन् १९४१ बाट भने कार्यक्रमको अवधि आधा घण्टा बनाइयो ।
‘बीबीसी हिन्दुस्तानी’को नामबाट सुरु भएको यस रेडियोको पहिलो सञ्चालक जुल्फिकर अली बुखारी हुन् । उनले १९४५ सम्म काम गरे । १९४७ भारत बिभाजन भएर पाकिस्तान अलग देश बनेपछि बुखारी पाकिस्तान रेडियोको पहिलो महानिर्देशक नियुक्त भएका थिए ।
सर्टवेभ प्रसारण बन्द भए पनि बीबीसी डिजिटल माध्यमबाट विवेचना र दुनियाँ कार्यक्रम नियमित प्रसारण हुने समाचार एजेन्सीले जनाएका छन् ।