नाइजेरियामा भएको बन्दुक आक्रमणमा २१ को मृत्यु
एजेन्सी,साउन २३ । बिहीबार बिहानीपख उत्तरी नाइजेरियामा भएको बन्दुक आक्रमणमा परी कम्तीमा २१ व्यक्तिको मृत्यु भएको स्थानीय प्रहरी स्रोतले शुक्रबार जानकारी दिएको छ ।
घटना नाइजेरियाको जाङ्गो कताफ इलाकामा भएको थियो।सो ठाउँमा केही समूदायबीच आपसमा गोली हानाहान भएको सरकारी समाचार स्रोतले बताएको छ । तर कुन समुदायबीचमा सो हमला भएको हो भन्ने बारे स्पष्ट जानकारी दिइएको छैन ।
राज्यका प्रहरी प्रवक्ता मोहमद जालिगका अनुसार बिहीबार राति बिहानीपखबाट सुरु भएको यस बन्दुक आक्रमणमा परी २१ व्यक्तिको ज्यान गएको बताइएको छ ।
मोहमदले सिन्ह्वा समाचार समितिलाई यस घटनाको पुष्टि गरेका छन् । नाइजेरियाको कदुना राज्यको जाङ्गो कताफ क्षेत्रमा यो आक्रमण भएको बताइएको छ । प्रवक्ताका अनुसार बन्दुकधारीहरुको हालसम्म परिचय खुल्न सकेको छैन ।
यद्यपि, स्थानीय मानवअधिकार समूह ‘दक्षिण कदुना पीपुल्स युनियन’ले बिहीबार प्रकाशित एक विज्ञप्तिमा कदुनाको जाङ्गो कताफको पाँच वटा गाउँमा भएको यस आक्रमणमा ३३ व्यक्तिको मृत्यु भएको जानकारी दिएको छ ।